Fir iech do
Déi eng schaffen am Gemengenhaus. Si hëllefen dir ënnert anerem, wann s du:
- an d’Gemeng Hesper plënners, fir dech unzemellen.
- eng Carte d'identité oder e Pass brauchs.
- eng Autorisation parentale muss kréien: dat ass en Dokument, dat d’Eltere brauchen, wann hir Kanner mat der Schoul oder engem Veräin op en Ausfluch ginn.
- däin Hond wëlls umellen.
- eng Baugeneemegung brauchs.
- Froen zur Schoul, zu Crèchen, zur Maison relais hues.
Anerer sinn de ganzen Dag an eiser Gemeng ënnerwee fir ze schaffen. Dofir si si oft op enger anerer Plaz ze gesinn. Hei e puer Beispiller:
- D'Gäertner suergen dofir, dass d’Hecken an d’Beem laanscht d’Stroosse schéi geschnidde sinn an dass mir iwwerall schéi Blumme stoen hunn.
- De Service vun der Hygiène mécht d’Poubellë bei de Spillplazen, am Park an op villen anere Plazen eidel.
- De Flexibus transportéiert d’Awunner an d'Awunnerinnen an der Hesper Gemeng hin an hier.
- Den Agent municipal passt op, dass d’Awunner an d'Awunnerinnen sech un d'Reegelen halen a kontrolléiert och de Parkticket bei den Autoen an de Vëlo bei der Coupe scolaire.
An der Hesper Gemeng ginn et och vill Awunner an Awunnerinnen, déi anere Bierger a Biergerinne fräiwëlleg hëllefen.
Zu deene Leit zielen ënner anerem d’Pompjeeën. Bei Iwwerschwemmungen, Bränn oder Accidenter si si ëmmer asazbereet a schnell op der Plaz.
Vun 8 Joer u kann ee bei de Jugendpompjeeë matmaachen. Ab 16 Joer wiesselt een dann automatesch bei déi grouss Pompjeeën.
Aner Leit engagéieren sech an enger Gemengekommissioun. Eng Kommissioun ass e Grupp vun Awunner an Awunnerinnen, déi an engem bestëmmte Beräich zesummen nei Iddien ausschaffen oder Léisunge fir Problemer virschloen.
Eng Kommissioun ka keng Entscheedungen huelen, si schéckt hir Virschléi un de Schäfferot.
An der Hesper Gemeng gëtt et zum Beispill eng Schoulkommissioun, eng Sports- a Fräizäitkommissioun, eng Mobilitéitskommissioun, eng Kulturkommissioun, eng Ëmweltkommissioun an nach vill anerer.
